你第一眼見到呢個公司logo，有乜感覺呢？
有好多客人接過我張咭片嘅時候，第一個反應都會話：「你公司嘅logo好靚啊！」
我真係要歸功於我既平面設計師，當年成功咁將我嘅「一點點」人才發展理念注入公司嘅logo設計。Logo中嘅一棵樹象徵著「育人」，所謂「十年樹木，百年樹人」，培育人才嘅工作就係一個嘅長遠又充滿生機嘅一個旅程！
至於樹上面一個個嘅「逗點」又代表乜嘢呢？
心理學家話畀我哋知，個人嘅思維想法十分重要，係正係負，積極定係消極，向上定係向下，全都足以影響一個人嘅身心情緒狀態！
逗點就係代表咗人與人之間嘅對話，而呢啲逗點有機會係「正逗點」一 即有建設性、鼓勵對方嘅説話，或「負逗點」一 冇建設性、打擊緊對方嘅説話。 兩種「逗點」都會影響住人與人嘅關係同距離。喺抗「逆」期間，我哋都需要多啲「正逗點」，彼此鼓勵！
我期待能夠喺職場上撒下更多嘅種子，讓種子慢慢成長，變成一棵傲然挺立、枝繁葉茂嘅大樹，為人們帶來林蔭大道， 貢獻社會！
Comments